Ընդդիմություն
ՍԵՐԺ ՍԱՐԳՍՅԱՆ. ՄԵՆՔ ՊԱՏՐԱՍՏ ԵՆՔ ՎԵՐԱԴԱՐՁՆԵԼ ԳՐԱՎՅԱԼ 7 ՇՐՋԱՆՆԵՐԸ
Ժողովուրդ» օրաթերթը գրում է. «Քաղաքական շրջանակներում շրջանառվող լուրերի համաձայն՝ ՀՀԿ-ի գործադիր մարմնի վերջին նիստում՝ Վարշավա մեկնելուց առաջ, Սերժ Սարգսյանն իր կուսակիցներին ասել է, թե ինքն ընտրության առաջ է կանգնած՝ կա՛մ պետք է համաձայնի հողերը հանձնել Ադրբեջանին, կա՛մ հրաժարվի, որի դեպքում արդեն պատերազմն անխուսափելի է: Հենց այս հանգամանքով է պայմանավորված այն փաստը, որ ՀՀԿ-ականները մեկը մյուսի ետևից, Մայր Թերեզայի դեմքի արտահայտությամբ շտապում են փոխզիջումների մասին խոսել, իբր հողերի հանձնումն այլընտրանք չունի և այսպես շարունակ:
Իհարկե, Հայաստանում բոլորը լավ գիտեն, որ այն պաշտոնյան, որը կփորձի հողեր հանձնել, ոչ միայն իր քաղաքական կարիերային վերջ կդնի, այլ կվտանգի իր ֆիզիկական գոյությունն ընդհանրապես: Այս իմաստով մի տեսակ հանգստություն կա հասարակական տրամադրություններում։
Ամեն դեպքում «Ժողովուրդ»-ը փորձեց ՀՀԿ-ականներից պարզել, թե կոնկրետ ինչ է ասել Սերժ Սարգսյանը ՀՀԿ ԳՄ նիստում, և ինչպես են զիջումների թեմային արձագանքել նժդեհական ներկայացողները։ ՀՀԿ երիտթևի 41-ամյա նախագահ Կարեն Ավագյանը, ի պատասխան մեր հարցին, ասաց. «Ոչ մի բան չունեմ այս մասին ասելու: Այսօր (երեկ) Արմեն Աշոտյանը մեծ ասուլիս է տվել, Էդուարդ Շարմազանովն էլ ԳՄ նիստերից հետո ներկայացնում է ամեն ինչ, ոչինչ չունեմ ավելացնելու»։ Իսկ ՀՀԿ խմբակացության և գործադիր մարմնի մեկ այլ անդամ Գագիկ Մինասյանն էլ լղոզեց հարցի բուն էությունը՝ ասելով. «Մենք շատ հաճախ անդրադառնում ենք Լեռնային Ղարաբաղի խնդրին և դրա կարգավորման հնարավորություններին»:
Այդպես էլ հնարավոր չեղավ պարզել՝ ԼՂՀ հարցով կոնկրետ ինչ է ասել Սերժ Սարգսյանը իր կուսակիցներին»։
Սերժ Սարգսյան. մենք պատրաստ էինք վերադարձնել գրավյալ 7 շրջանները
Սերժ Սարգսյանի «ադրբեջանական 7 շրջաններ»-ից 7-ը դուրս են թողել
CIVILNET-ը գրում է. «Բաղրամյան 26-ը Սերժ Սարգսյանի՝ 2016թ․ նոյեմբերի 17-ին «Ռոսիա Սեգոդնյա» միջազգային լրատվական գործակալության գլխավոր տնօրեն Դմիտրի Կիսելյովի հետ հարցազրույցի սղագրված տարբերակը խեղաթյուրված է ներկայացրել:
51 րոպե տևողությամբ այդ հարցազրույցը աղմկահարույց էր նրանով, որ Սերժ Սարգսյանը խոստովանել էր, որ 2011-ին Կազանում «հայկական կողմը, հայկական կողմերը՝ Լեռնային Ղարաբաղը և Հայաստանը, թողնում են այն տարածքները, որոնք այսօր զբաղեցված են որպես անվտանգության գոտի: Այսինքն, այն տարածքները, որոնք ադրբեջանցիները համարում են գրավյալ՝ 7 ադրբեջանական շրջաններ: Մենք թողնում ենք այդ տարածքները և հեռանում»:
Փաստացի, Սերժ Սարգսյանը դարձել էր Հայաստանի նախագահներից առաջինը, ով հրապարակավ խոսել էր Ադրբեջանին «7 շրջաններ» վերադարձնելու իր պատրաստակամության մասին՝ դա ներկայացնելով Կազանյան փաստաթղթի շրջանակներում պայմանավորվածություն հակամարտության կողմերի և միջնորդների միջև:
Նախկին նախագահներ Լևոն Տեր-Պետրոսյանը և Ռոբերտ Քոչարյանը, նրանց արտգործնախարարները ևս բազմիցս հրապարակավ խոսել էին տարածքներ վերադարձնելու պատրաստակամության մասին, բայց երբեք չէին խոսել բոլոր 7 շրջանները վերադարձնելու մասին:
Հարցազրույցի օրերին իշխանական լրատվամիջոցները, փորձագիտական ու քաղաքագիտական հանրությունը ուղղակի լռության մատնեցին Սերժ Սարգսյանի այդ հարցազրույցը․ կարծես ոչինչ չէր եղել:
Եվ ահա երեկ ես պատահաբար հայտնաբերեցի, որ Բաղրամյան 26-ը համարձակվել է խեղաթյուրված ներկայացնել այդ հարցազրույցի սղագրված տարբերակը: Նախագահականի կայքում ներկայացված սղագրության մեջ Սերժ Սարգսյանի «7 ադրբեջանական շրջաններ»-ից 7-ը դուրս են թողել: Բաղրամյան 26-ը, բնականաբար, չէր կարող տեսանյութը մոնտաժել, որպեսզի Սերժ Սարգսյանի շուրթերից հեռացնի յոթ թիվը: Իսկ ահա սղագրության ժամանակ դժվարություն չի ներկայացրել այդ յոթ թիվը հանել:
Աղմկահարույց այդ հարցազրույցի սղագրությունը նախագահականի կայքում դրված է հայերեն և ռուսերեն լեզուներով և երկու տարբերակներում էլ յոթ թիվը հանված է, ինչը նշանակում է, որ հատուկ հրահանգով է այդ թիվը հանվել: Հատկանշական է, որ ռուսերենով հարցազրույցի տեսագրությունը ևս չի դրվել նախագահականի կայքում:
Ներկայացնում ենք Սերժ Սարգսյանի հարցազրույցի ռուսերեն տեսագրությունը ամբողջությամբ՝ սղագրված այն հատվածը, որտեղ Սարգսյանը խոսում է «7 շրջաններ» վերադարձնելու մասին, ինչպես նաև Բաղրամյան 26-ի սղագրված տարբերակները երկու լեզուներով՝ հայերեն և ռուսերեն: Անգլերեն սղագրություն նախագահականի կայքում դրված չէ:
Ահա այդ հատվածի ճշգրիտ հայերեն թարգմանությունը. «Այսինքն, հայկական կողմը, հայկական կողմերը՝ Լեռնային Ղարաբաղը և Հայաստանը, թողնում են այն տարածքները, որոնք այսօր զբաղեցված են որպես անվտանգության գոտի: Այսինքն, այն տարածքները, որոնք ադրբեջանցիները համարում են գրավյալ՝ 7 ադրբեջանական շրջաններ: Մենք թողնում ենք այդ տարածքները և հեռանում»:
Բաղրամյան 26-ը այսպես է սղագրել. «Այսինքն` հայկական կողմերը` Լեռնային Ղարաբաղն ու Հայաստանը, թողնում են այն տարածքները, որոնք վերցված են որպես անվտանգության գոտի, այն տարածքները, որոնք ադրբեջանցիներն անվանում են բռնազավթված։ Թողնում ենք տարածքները, հեռանում»:
Ահա ռուսերեն տարբերակը, կրկին խեղաթյուրված և առանց յոթի. «А именно: армянские стороны, то есть Нагорный Карабах и Армения, оставляют те территории, которые сейчас заняты как зона безопасности, те территории, о которых азербайджанцы говорят, что они оккупированы»».
Comments