ՌՈՒՍԱՍՏԱՆԸ ՀԱՅԱՍՏԱՆԻ ԱՆՎՏԱՆԳՈՒԹՅԱՆ ՀԻՄՔՆ Է

Փաշինյանը՝ որպես մեծ մանիպուլյատոր

Հայաստանի անվտանգության հիմքը Ռուսաստանի հետ ռազմական դաշինքն է. Երևանը քննարկում է Գյումրիում ռուսական ռազմակայանի ընդլայնման հնարավորությունը: Այս մասին հայտարարել է ՀՀ վարչապետ Նիկոլ Փաշինյանը:

Չորեքշաբթի ելույթ ունենալով Հայաստանի խորհրդարանում՝ Փաշինյանը բարձրացրեց հանրապետության արտաքին անվտանգության հարցը՝ նշելով, որ դա կախված է Ռուսաստանի հետ համագործակցությունից: Նրա խոսքերով, Երևանի համար մեծ նշանակություն ունեն ՀՕՊ միասնական համակարգը և հայ-ռուսական միացյալ խմբավորումը, որն իր մեջ ներառում է 102-րդ ռուսական ռազմաբազան և ՀՀ ԶՈՒ 5-րդ բանակային կորպուսը:

ՀՀ վարչապետն ընդգծել է, որ ներկայումս քննարկում կա Գյումրիում ռուսական ռազմաբազայի հնարավորությունների ընդլայնման, ինչպես նաև Սյունիքի մարզում այդ բազայի մասնաճյուղ ստեղծելու մասին, որտեղ ռուս սահմանապահները ծառայում են Հայաստանի սահմանը պաշտպանելու համար:

Ավելի վաղ հայկական ընդդիմությունը բազմիցս հայտարարել է Հայաստանի տարածքում երկրորդ ռուսական ռազմաբազա տեղակայելու ցանկության մասին, որպեսզի ապահովագրվի Ադրբեջանի կողմից հավանական հարձակումից: Ավելին, խոսքը մասնավորապես Սյունիքի շրջանի մասին էր, որպես ռուսական բանակի տեղակայման հավանական վայր:

Սակայն արդեն այս տարվա փետրվարին ՀՀ պաշտպանության նախարարությունը հայտարարեց, որ երկրորդ ռուսական ռազմաբազայի մասին խոսք լինել չի կարող: Փոխարենը առաջարկվեց ընդլայնել Գյումրիի 102-րդ ռազմաբազայի հնարավորությունները՝ ռազմական անձնակազմի մի մասի Սյունիքի մարզ տեղափոխմամբ: Բանակցություններ են ընթանում:

1995 թվականից ի վեր Գյումրիում տեղակայված է 102-րդ ռուսական ռազմաբազան: Անձնակազմի ընդհանուր թիվը մոտ 5 հազար մարդ է: Հենակետը ներառում է նաև Երևանի «Էրեբունի» օդանավակայանը: Ավիաբազան զինված է արդիականացված ՄիԳ -29 կործանիչներով, Մի -24 Պ հարձակողական ուղղաթիռներով և ռազմական տրանսպորտային Մի -8 ՄՏ-ով:

Ռուսական մամուլ